 |
| Ayaan Kaaba |
Waxaa maalmihii la soo dhaafay baraha bulshada qabsatay maansada Warda Xaashi Ninkeeda, oo ay curisay abwaanad Ayaan Axmed Caydiid (Ayaan Kaaba).
Maansadan oo ka hadleysay dabeecadaha ragga qaar oo ay Ayaan tirisay sanadkii la soo dhaafay, ayaa haatan ka hadalkeeda uu dib usoo cusboonaaday, kaddib markii laga sameeyay hees iyo ruwaayad, sida ay sheegtay Ayaan.
Maansada oo dheereyd ayaa waxaa tuducyadeeda ka mid ah:
Weligeyn nin abwaan ah
Jaceyl maanu wadaagin
Balse wiil cuna qaadka
Xiriir waanu sameynay
Hadduu dookhu wareero
Wax kastuu ku tusaaye
Waanigii bartay maalin
Mid shaxaadka ku waalan
Anigoon waxba haysan
I dhahaaya walaalo
Way xumaatay zaaduye
Waxaad hayso isii bar
Taasi maaha wax weyne
Waanigii arkay doobab
Sida naago war qaada
Weli way socotaaye
Rag waxaa ugu liita
Kan na soo waca late-ka (xilli dambe)
Na weydiiya taswiirta
Waqtigan hadda jooga
Nin wanaagsan la waaye
Waxaan weerar ku qaadi
Ama aan la wadaagi
Warda Xaashi ninkeeda
Falcelinta ka dhalatay
Qeybaha dambe ee maansada, ee ay Ayaan ku leedahay "Warda Xaashi ayaan ninka la qeybsanayaa," ayay dad badan ka soo falceliyeen. Iyadoo dadka qaar ay maanso kale ugu soo jawaabeen.
Ragga qaar ayaa soo matalay Warda Xaashi ninkeeda, halka gabdhaha qaarna ay matalayeen Warda qudheeda. Qaar kale ayaaba la yaabban Ayaan Kaaba iyo hablaha kale ee wada doonaya Warda ninkeeda, maaddaama uu yahay nin reer leh.
Sidee ayay ku timid maansadan?
Ayaan Kaaba oo BBC-da la hadashay ayaa sheegtay inaysna jirin wax gaar ah oo ay ka sameysay maansadan, balse ay ka ahayd uun maanso kaftan ah oo ay ku tilmaameyso dabeecadaha qaar ee ragga.
"Isma lahayn sidan ayay bulshada dhexdeeda ugu faafi doontaa" ayay tiri Ayaan.
Ayaan oo inta badan maansooyinkeedu ay ku saabsan yihiin arrimaha bulshada, ayaa sheegtay in markii ay ku hal qabsaneysay Warda Xaashi Ninkeeda, uu markaas niyaddeeda ku jiray sifaha nin wanaagsan, oo markaas ay la ahayd inuu xaas leeyahay nin sifahaas leh.
"Warda Xaashi ninkeedu horta waa qof aad u wanaagsan, waa qof dadnimo, dabeecad iyo dad la dhaqanba leh. Intaa waxaa u u raacda, inuu yahay qof deeqsi ah, ka warheyn badan, naxariis badan oo markaad la hadleyso iyo la joogtaba aad xasilooni badan ku dareemeyso. Waa qof aad muxtarim u ah, waa qof ahlu diin ah, waalid jecel, boqollaal jeer kugu soo celcelinaya qiimaha waalidka iyo in loo samofalo.” Ayay tiri Ayaan Kaaba.
Waxaa Qoray: Fatuma Maalim Abukar
Waxaa Lagu daabacay Bogga BBC Somali
No comments:
Post a Comment
Arigtidaadu waa muhiim